حظوظه ضعيفة… مرشح حزب ( اللقلق ) بالناظوريراهن على شراء الأصوات..

جريدة البديل السياسي -سعيد الرياني 

بدا السباق الانتخابي على اربعة مقاعد فإقليم الناظور كيسخن، وسط تحركات مكثفة للمرشحين ومحاولات لحشد الدعم قبل موعد الاقتراع.

وحسب المعطيات اللي وصلات لآذان «الجريدة  »، كيتداول فالكواليس أن واحد المرشح ( حزب اللقلق )، اللي ما بايناش حظوظو قوية، كيقول للمقربين منو إنه مستعد يوصل ثمن الصوت حتى لألف درهم باش يضمن المرور للبرلمان، وهي معطيات كاتبقى محتاجة للتأكد، خصوصا أن شراء الأصوات جريمة انتخابية خطيرة كيعاقب عليها القانون.

وزاد الجدل بعدما تروج أن المرشح ( حزب اللقلق ) نفسه كان كيدوز العطلة فكوسطا ديل صول، فالعز ديال استعداد الأحزاب للحملة الانتخابية، وبان مرتاح بحال إلى المقعد مضمون، لكن منين وصل الخبر للإعلام، جمع حقيبتو ورجع بسرعة للمغرب، بعدما نبهاتو قيادات الحزب ديالو لخطورة الصورة اللي ممكن يعطيها للناخبين.

وفالمقابل، كتشير أغلب المعطيات الميدانية داخل إقليم الناظور إلى أن التنافس الحقيقي على المقاعد الأربعة غادي يكون التنافس ساخن ، بالنظر لقوة المرشحين في الدائرة .

ويبقى صوت الناخبين هو اللي غادي يحسم النتيجة، وسط ترقب لأي تحركات مشبوهة أو محاولات لاستعمال المال للتأثير على إرادة المواطنين.