الزواج ماشي لعبة… راه مسؤولية نفسية واجتماعية واقتصادية

 بدر شاشا.- جريدة البديل السياسي

بزاف ديال الناس اليوم كيتزوجو بلا ما يفكرو، بلا ما يحسبوها مزيان، غير باش يديرو عرس ويتسماو مزوجين.

ولكن من بعد، كتجي الكارثة: تشكي، تبكي، وتلوم الفقر والمعاناة والمجتمع… ولكن راه المشكل فـ الاختيار ديالك، ماشي فـ الناس اللي معاك.

واش معقول تزوج، وتولد 5 ولا 8 دراري، ومن بعد تبقى تقول الدولة ما دارتش ، الحكومة ما عاوناتناش، الناس قاسين علينا؟ لا، راه انت السبب، انت اللي خديتي القرار، وانت خاصك تحمل العواقب. الزواج راه ماشي غير عرس وسيلفي مع الكسوة، راه حياة كاملة، فيها مصاريف، فيها دراسة، فيها كراء ولا سكن، فيها الصحة، فيها اللباس، فيها التربية، فيها طلاق حتى، إلى ما كانش تفاهم.

كاينين رجال دايرين منتخب ديال الولاد، وكيخليوهم يتعذبو: – ما لاقين باش يقراو – ما لابسينش مزيان – ما عندهمش أب بسيّرة ولا أم هانية ومن بعد كيولي الأب كيشكي، والأم كتشكي، والضحية هو الطفل اللي دخل الحياة بلا ذنب.

وحتى المرأة كتشارك فهاد الخطأ: كتبدا بتمثيل أنا غنتصبر، نعيش معاك فالخبز والماء، المهم تكون راجل.. ولكن منين كتدخل لدار الزوجية، كتنوض المشاكل، كيبدا الصداع، كيبان الطمع، وكيبدا الضغط.

والنتيجة؟ طلاق، مشاكل أسرية، دراري كيعانيو نفسياً، مجتمع كيتكرفص من الداخل. باش تزوج، خاصك تكون راجل عن حق، وعارِف شنو كدير.

وباش تكون مرا، خاصك تكوني واعية، ماشي غير باغية الهروب من دار الوالدين. الزواج ماشي هروب، ماشي موضة، ماشي لقب، راه مسؤولية، خاصها نضج، تفكير، واستعداد. إلا ما كنتيش قد المسؤولية، خليك فحالك حسن، وخلّي معاك المجتمع يرتاح من مشاكل أسرية